قصيدتي زاد بعيوني جمــــالها وأخذت أنقِّي بالمــعاني جزالها
وأكتب معانيها من الشوق والغلا لأمي وأنا أصغر شاعرٍ من عيالها
كتبتها في غربتي يوم رحلتي لما طرالي بالســــــفر ماطرا لها
أمي وأنا أصف لها زود حبها وإن ماحكيت لها قصيدي حكالها
أمي لــــــها بالجوف والقلب منزلة مكانةٍ مــــــا كل محبوب نالها
أقرِّب من ظلالي وأنا وسط غربتي وأنا تراي أقرب لها من ظلالها
ما رأت عيوني من الناس غيرها ولا خلق ربّ الخلايق مثــــالها
أغلى بشر في جملة الناس كلّهم وأكرم من يدين المزون وهمالها
أتبع رضاها وأرتجي زود قربها واللي طلبته من حياتي وصالها
الصدق مرساها والأشواق بحرها والعطف وإحساس الغلا رأس مالها
أهيم فيها وأبتسم يوم قلبها يسأل وأنا قلبي يجــــاوب سؤالها
وإن طلبتني شيء فزِّيت مندفع أموت أنا وأحمل تعبها بدالها
ـ