ابوك غراب لو امك لگلگ

قصة صورة🌻
يكولك .. جانت رازقية احلى وحدة بالمحلة😍 سوالفها وملگاها يرد الروح وذيچ الندارة للفلك تكوله ولك🤨
بس ابنها (شهوبي) شالع أفادها هم وكيح وهم سويچ🥴
يدور الطلايب دواره .. مرات تدزه للتكان يتأخر يله يرجع
يظل بالدرب يتملعب لو يسويله مشكلة بس هي فرحانة بي
وتكابر (يمه شهوبي الوردة وقندرته فرده وفرده وألف ولد مجنون ولا بنية خاتون)😘 عاد صاحته وهالمرة كالت :

_ حبيبي شهوبي قربان هالوجه الحلو ادزك للتكان جيبلي
شكرات اليوم خميس ليلة الجمعة اريد اسوي صينية الخضر💚 اني حضرت سبع بياضات وانت جيب مسقول وحامض حلو وچكليت🍬اريد أوفي نذر ابوك لگه شغل

وركض شهوبي شليييع وشاف ولد المحلة يلعبون بالدرب يم بيت عتيگ متروك وغادي خرابة .. فدخلو الجهال للخرابة وصعدو قسم منهم للسطح الاولاني وقسم للسطح الثاني وبدت الچلابة واحد بيهم كال :
_ منو منكـم يگدر يطير منا للگاع ؟؟!!
ومحد جاوب لان عالي ويخوف🙄 جان شهوبي باع بطوليات براسهم وعاط بكل ثقة :
_ تدرووون ؟ ترة آني أگـدر أطيررر 😏

گامو يصفگون الزعاطيط ويصوفرون :
_ يا الله أشو راوينا شطارتك !!

شهوبي رفع ايديه وكام يهزهن عود ديرفرف مثل الطير😐
وشمر روحه من السطح للگاع طررررب !!!
وانكسرت رجليه😑 وعيطو الجهال وألتمو اهل المحلة
وجتي ام شهوبي وابو شهوبي يركضون وعرفو السالوفة
فكال أبوه وهو يلطه راجدي ابو الونة :
_ ولك ملعـون الوالدين😡 ما تفهمني شلون تگـدر تطير ؟ أي أنت أبوك غراب ، لو أمك لگـلگ حتى تگـدر تطير ؟!!

يكولك فصار هذا مثل شعبي متداول (ابوك غراب لو أمك
لگلگ ) بذاك الوكت للشخص الي مابيه خير ويفوت خشمه بالصغيرة والجبيرة وهو لايحل ولايربط كاضيها همبلة وعنتكة وقشمريات بوخة دوخة😒
إييييه جبناها على مدري منو😬 الي عجبته القصة يربح ويانه دولمة حامضة لاچعة بالضلوع🥰
الي مو فاهم اي مفرده حاضرين نفسر للطيبين

المواضيع المتشابهه:

• كن هادئًا في الحوار مع ابنك
• كيف تجعل ابنك متميـــــــزاً ؟
• يحشر الناس يوم القيامة حفاة عراة
• كيف تربي ابنك

ناطق العبيدي ,الجوري ,شموخ الكلمة و 3 آخرون معجبون بهذا

اميرة الحب ,عاشق القصيد ,ALHDRAMI