عمرك فكرت تكون مُسمــآر ؟!
آه مسمار.
مسمار يسند كل اللي حواليه
يَحفر كل حاجة كويسة في الناس
مسمار سعادة.... مسمار تفاؤل.
مسمار لما يتشال من الحيطة يطلع بكل الحزن والكآبة من الحيطة اللي كان فيها.
مسمار لما يتزرع في حياة حد محتاج مجهود ودقدقة
ولما يطلع منها محتاج مجهود أكبر.
أحلى حاجة في الدنيا أنك يكون عندك مسمار قريب منك (صحبة صالحة بجد)
أو حد يسندك
يشيلك ويرفعك فوق عن كل حاجة وحشة ممكن تقابلك.
مسمار يرفعك على الحيطة فوق بعيد عن كل مشاكلك.
مسمار جَدَع وجامِد بيستحمل ويشيل حاجة كده من النوع الغالي...
مش مسمار خِرِع ومع أول دقة شديدة وموقف بجد يوقعك ويخذلك.
لازم كلنا نِدَعبِسْ في حياتنا على المسمار الصُّلب
ولازم احنا كمان نكون أجدع مسمار في حيطة الناس
علشان أحلى إحساس أنك تكون سَنَد وسبب في حياة اللي حواليك
إوعى تعيش من غير المسمار الصلب في حياتك !
صدقني هتبقى غلبان أوي
يا رب كتَّر كل المسامير الإيجابية اللي ممكن تتحفر في حيطة حياتنا
وكل مسمار واختلافه !!
دق بإيدك مسامير جديدة في حياتك
واخلع أي واحد يصدِّي ويبقى وجوده مجرد خُرم مش محتاجه !
07-04-2013
خليك مسمار
العرض العادي
