سرقة الايميل
قام بعض الهكرز بسرقة ايميل الشاعر الحميدي المريبيط .. فأفرغوه من الرسائل .. وغيّروا رقمه السري وأغلقوه .. فكتب إلى زميله كرباج هذا الحادث الأليم ويقول :
كرباج وإن كانك تنشد عن ايميل .. الايميل والله يا صديقي غدا لي
ايميل يسوى له ثلاثة رجاجيل .. من الرجال مُلحّقين التوالي
يا كم على ظهره نقلنا مراسيل .. ويا ما يجوب الدار شرق وشمالي
ويا كم يودي طيّب الذِكر ويشيل .. إليا ارتكى للحمل مثل الجِمالي
ويا ما أضفت عليه خمّة مهابيل .. اللي يجيبون الغثا والعنا لي
ويا ما تجاذبنا علوم وتعاليل .. مع البنيّ متعبات العيالي
والبارحة يوم استوت هجعة الليل .. ولا فيه همٍّ من همومي طرا لي
والنوم جا له في النواظر مداخيل .. وشكا سهر عيني ونومي شكا لي
دكّوا عليه اللي كما دكّة الخيل .. لا جا لهن فوق الطريح اجتوالي
وتقاسموا ما بينهم من محاصيل .. لين انفضوا بطنه وخلوه خالي
وقاموا يجرّون الغنى والمواويل .. وتباشر الأقصى بعلوم الموالي
ثم أغلقوه الفارغين الجهاهيل .. واستبدلوا رقمه برقم بدالي
ويا الله يا محي ثرى الارض بالسيل .. يا منبت غصون السّلم والسيالي
إنك تجازي كل من يسرق ايميل .. وتعوضني باللي غدا من حلالي