مسحراتى ونصيحه يوماتى..!!

اقتباس:
المشاركة الأصلية كتبت بواسطة حائره
روعــــــــــــــــــة موضوعك
سلمت أناملك وسلم إبداعك
ودمتي بحفظ الله ورعايته

حبيبتى ربنا ما يحرمنى منك يا عسسسل انتى
نورتينى

مسحراتي وكبرت طبلتي
عشااان تتمشى مع نصايح حضرتي
وصوتها يكون عااالي ويصحى صاحب النوم التقيل
وبطلب كمان السماح من اللي تعبان وعليل
كلامي النهارده يمكن ميعجبش ناس كتير
طبعهم غريب والله ولا يسوى أي تقدير
قبل رمضان شتايم وسب
في رمضان احترام ولسان طيب وكله شت أب
هو قبل رمضان رب وف رمضان رب
احترم لسانك وبلاش تتكبر
بأدبك تمشي كده وتتمختر
ولا يعجبك حد وتتمنظر
خلص كده الكلاااااام
دخلين ع السحور وبلاش بكره نفطر

متخافوش ... متخافوش
كلها وشوش بس وشوش
زيف ع الوش منقوش
الغريب ان مصرنا محتاجه مجرد رتوش
اصحوا واسمعوني ومتجروش
بقيت ماشي خايف وبطبل بحنيه
أحسن ألاقي حاجه مستخبيه
ابعتولي كوباية زبادي
أكلها وحده وحده ع الهادي
هسهر أحميكم بناي وطبله يا ولادي
مبقتش مسحراتي
بقيت مغنواتي
خليكم كده زي حلاتي
أغني على نفسي وأردد غنواتي
وأوهم حالي بالأمان يوماتي
قااعد هنااا للفطور يا أخواتي
ليكم غالي تحياتي

شوفوا مين جي يصحركم
صغير ... كبير للود واصلكم
اياااك تستهون بالصغير ولا تعمله حساب
ده اللي ف لحظه يعمل الدهب م التراب
عاايزين منكم تشجيع وكلمات الثواب
مش كل شويه عقاااب ... عقاااب
بشطارتكم .. معاكم هم مفتوح كتاب
ونقول هلا بالسهل بعيد عن الصعاب
ويعيشوا واقعهم أبدا مش سراااب
وأقلامهم هيكونوا أقوى م الحرااب
ترشق في صدور الأعادي وتعلى الرقاب
آخر كلامي خلّوا باكم م الشباااااب
وأتمنى لكم سحوور شاهي يا الصحااب

مين حس فيكم بفانوس غزه
مسجون ولا لاقي حتى النسمه
مخنوق م الأسر وبيطلب نجده
بس الغريب انه من وراا القضبان في نور
حاسس بالناس وهو ع البيبان يدور
مسير الحريه تيجي والقضبان تزور
حتى لو راح صوتنا والذراع بقاا مبتور
ونترك العشش ونسكن القصور
وعلى كل قبر شهيد ننثر الزهور
معلش تعبني شكل فانوس غزه ورا القضبان عصفور
مكسور جناحه وهو في وقت البكور
يلا نشف ريقي وحااان وقت السحور
مسحراتي غلبان

صحيت النهارده لقيت نفسي مخطوف
هو أنا بقول كلام خارج عن المألوف ؟
الكل فااهم وتلميحي معروف
العيب يا ناس اننا فاهمين معنى الحروف
وبنحط النقط ولو على رقبتنا السيوف
هو كده .....
لازم تقول الحق لاننا ع الدنيا ضيوف
يعني تنام على مخدتك وانت عامل معروف
بدااال ما تندم متاخر وتضرب الكفوف
حياتي مثلكم للأسف تحت الظروف
مش هطوّل عليكم ..
عشان محدش يقولي اسكتي احسن غيرك نشوووف

صوتي وااصل للبعيد والقريب
عن الصديق هيكون لي كلام عجيب
جرّب معايا يمكن كلامي يصيب
نجيب من الاكياس تلاته
ونوزعهم على تلاته
ونطلب منهم كل ما يزعلوا حد
يحطوا تفاحه ويقفلوا الكيس
وده هيكون من الايام أسبوع
كلام طيب مافيهوش رجوع
صاحبنا الاولاني بيخسر من الاصحاب كتير
كيسه مليان تفاح ومقفول عليه
صاحبنا التاني تفاح قليل ومقفول عليه
صاحبنا التالت تفاحه او اتنين ومقفول عليه
تفاح ومقفول عليه يعني عفن تتمنى ترميه
حمل تقيل هو خسارة الصديق
يا بشر الصديق وقت الضيق
كان ف الاول فواح مثل التفاح
وبخسارته صار حِمل وفتيل بدون مصباح
حاسب ع الصديق وايااك بسوء الرفيق
أشوفكم بكره ونتقابل في أقرب طريق
مسحراتي غلبان يلف المكان

،،، أجزل الله لك العطاء أنزلك منازل الصديقين والشهداء
في جنة رب رحيم قادر على ما يشاء ،،،

مع رمضان والليالي الحساان

جيت أسحر كل أصحاب المكان

هخبط بشويش أدام فرن العيش

وهخبط بأصوول أدام كل عربية فوول

وهقف في وسط الحااره وأنادي

حد يحدف للغلبان علبة زبادي

و ف وسطه القعده الحلوه

هقول كام كلمه تزيد القوه

خليك في حالك

ولا تطمع في مال غير مالك

ولا تبص على خيرات غير دارك

كان معانا بستاني يراعي بستانه

واخد باله من مااله عشاان عياله

وف يوم مر الثعلب وشااف الشجر وجماله

قال لو أطول أنط السور وآكل ثماره

ولما نط قال هيكون البستاني مش واخد باله

طول الليل يآآكل ويسيل لعابه

بطنه انتفخت وساار تقيل جناابه

حاول ينط لما شقشق الصبح احتار في حاله

لقى البستاني جاي من بعيد

عمل نفسه مييت أكيد

وقال في باله لو شفني مرمي هيرميني بعيد

قرّب البستاني من المكار

ومن غير تفكير ولا يحتار

حط عليه العشب وكان هيولع فيه الناار

فاااق بسرعه وجرى

وقااال في نفسه بحسره

دخلت جاائع وخرجت جائع لييه يا ترى ؟

عشاان بصيت على شيء مش لياا

وطمعت في تعب غيري وكانت غيّه

خلاااااص توبه من دي نوبه

مش همشي مع الريح

بداال ما أخسر كل شيء وبالوبا أطيح

معاااااااااكم كان مسحراتي عامل نفسه فصيح

هو على أد حاله ممكن بس صريح

أشوفكم بكره وهجري دلوقت أسرع من الريح

اقتباس:
المشاركة الأصلية كتبت بواسطة همس المطر
،،، أجزل الله لك العطاء أنزلك منازل الصديقين والشهداء
في جنة رب رحيم قادر على ما يشاء ،،،



اللهم امييين يا قلبى
ولك بالمثل يا قلبى انا
متحرمش منك يا روووحى