ديوان الشاعر : عبدالله بن علوش الهاجري

خبر شين


يالله عسى ماجاك مني خبـر شيـن
ياشيخ ياشاعـر يافـارس يارجـال


ميزاتـك الاربـع كفيلـه بثنتيـن
بعد النظر والثانيـه وسعـة البـال


وان عذربوني عنـدك المستفيديـن
فانا غنـي قبـل اعرفـك ولازال


بخير واخـذ واعطـي المستحقيـن
لني اعبد الله مانيـب اعبـد المـال


لني مـا مدحتـك ببيتيـن
والا علشاني مدحت ابـو الافعـال


المدح للي يقشـع الفقـر والديـن
المدح للي يهوم هومـات الابطـال


المـدح للـي يلتفـت للمساكيـن
المدح للـي كـل وقفاتـه ثقـال


وانا حسب ما شفت لاشين لازيـن
عادي ولا يسند على العادي جـزال


المـدح ماياتيـك بالهـون والليـن
ياوردة ماتنبـت الا علـى الجـال


ماقـول لـي شـي بليـا براهيـن
حتى اللي بيكذب يبي شـي ينقـال


قبلك سعى للمدح راعـي ملاييـن
وحاول وخليته يحاول ولا احتـال


شرحت مافي خاطري لك وذالحيـن
جعلك غني ولاهنت في كل الاحوال

تجربتي الشخصية






لا علشان الكبـار ولا علشـان الصغـار
من حشم نفسه حشمها وهانها مـن هانهـا
القلوب اللي تحشى والعقول اللـي تـدار
ماتميـز فـي وفـي النـاس مـن خوانهـا
ولو تعرف الهذرويه ويـش لـذة لختصـار
كـان عينـت الاوادم واجـد شيخانهـا
تكبر النفس الكبيره بين غـار وبيـن نـار
غارها كبـار الهقـاوي ونوشهـا نيرانهـا
والنفوس المستريحه ماتحاتـي ويـش صـار
لا تجـازي مـن يعنيهـا ولا مـن عانهـا
يبني ابن ادم ويدري كل مـا يبنـي دمـار
ما يحب الله من الاعمـال غيـر احسانهـا
لاجفتك الدار فارقهـا وبـدال الـدار دار
الصبر عنها ولا صبـرك علـى حقرانهـا
قارب طوال العمار وفارق طوال العمـار
كـان فالبستـان ورده شوكهـا بوزانهـا
والدفاعات القويـه مايفككهـا الحصـار
حتى لو طرواده تهـوز العـرب بحصانهـا
اختلاف الراي نعمه وانعدام الـراي عـار
والجمال اللـي تحمـل حملـة حشوانهـا
والكرامه راس مال وكان راس المال طـار
لا يعـز الله دولــه ماتـعـز انسانـهـا
والحفـاوه والصداقـه والمحبـه فالنـهـار
القلوب بيـوت ليـل سكـرت بيبانهـا
والغرور اول دخول الرجل دايـرة البـوار
راح يرفع من قدر نفسـه ووطـى شانهـا
والغضب سيف الجهاله كل ماسل استـدار
وبت يمنى لوحت بـه وسلمـت عدوانهـا
والخطى يدمح ليامن عقبه حسـن اعتـذار
مايساوا البـوح بالزلـه مـع جحدانهـا
والصغر ماهوب سفاهه والكبر ماهوب وقار
كم كبير سايـق روحـه علـى نقصاهنـا
والهوى تفسيره اصعب شي وكباره كبـار
خلـد التاريـخ نـاس خلـدة خلانـهـا
والتطور عند بعض النـاس يعنـي لاتغـار
غظ طرف وكف يدك ولا تشـد عنانهـا
فك بنتك فالشوارع مثل تكسي الاجـار
ولا تدخـل لا بقصتهـا ولا بفستانـهـا
كل شي نحسب انه مستحيل يصيـر صـار
يالله بستـر القلـوب المؤمنـه بيمانـهـا
والمجامل فالامـور العابـره مالـه مضـار
من يصارح كل خلـق الله يبـي خسرانهـا

مفتوح .. ومسكر



مفتوح ومسكر مسكر ومفتـوح
تشوف رقمي وكن منت بتشوفـه


شبعان وشايف خير مانيب مشفوح
واللي يبي شوفي فانا احب شوفـه


بتروح قل بروح واقولـك روح
ولا على وجه المقفـي حسوفـه


والا احساسي قد له سنين مجروح
من سيدة كـل الزيـان العزوفـه


اللي لها كل الغلا قـاع وسفـوح
عند اسمها كل اسم امره واطوفـه


صدقي لها ولغيرها لعب ومـزوح
والقلب كل اللي يجونـه ضيوفـه


ضيف لمنـه راح تبرالـه الـروح
وضيف لمنـه راح جعلـه ذلوفـه


والا انت ياراعي مسكر ومفتـوح
مارية الكـذاب كثـرة حلوفـه

ابن عمك




ابن عمك لا ازعلك شره عليه
يقنعـك بالحـق والا تقنعـه


انشده وش جاه والا ويش فيه
انشـده ولا تقاطعـه اسمعـه


حتى لو انه المخطـي ماعليـه
مشها مادامهـا تمشـي معـه


وكانك المخطي وهو رايه وجيه
اصبر ولو يوجعك لا توجعـه


وكان قصر وانت عادك ترتجيه
لاتقصر فيـه لا جـاك انفعـه


ساسه الطيب على الطيب يحديه
ياصلك حتى لو انـك تقطعـه


وان بلاك الله برجـال سفيـه
روح فاسناعك وخله فسنعـه

مشعل الزعبي


عجايب مشعل الزعبي عجايب
بيوته مثـل همـال السحايـب


وانا مافيه شاعـر قـد تركتـه
يمر الا بعـد دفـع الضرايـب


ولكن مر مشعل عصـب عنـي
ولاهو مخطي ومانيب صايـب


صحيح استـاذ لكنـه غلبنـي
وشيبني وانا مانيـب شايـب


تشرفنـي صداقتـه النبيـلـه
ومنها خاطري ماهوب طايـب


فيـا جمهـوري الغالـي تمتـع
وشوفوا فكر مشعل ويش جايب


اذا ما قلتوا صـح الله لسانـه
(فلاني بشاعر الشرد الغرايـب)

آخر حلقة


اطلب اللي شرع ابوابه مهيب منغلقـه
في وجيه عباده اللي يرتجـون افضالـه


ولا توقف في وجيـه العالـم المنطلقـه
من وقف فوجيهها ماهوب يسرك حاله


وش تسوي يالشجاع وناطحينك شلقه
كم شجاع تربوها لـه وهـو بلحالـه


والحقيقه دايما تطلع مـع اخـر حلقـه
قد بعضنا راس مالـه غترتـه وعقالـه


فيه رجل من صلاة الصبح مثل الطلقـه
مجتهد ولايحصـل غيـر مـا الله قالـه


وفيه رجل حظه العاثر نشب في حلقـه
وفيه رجل ماتعـب والله مزينهـا لـه


انما الارزاق عنـد الله ويعطـي خلقـه
لاهي بالقوه ولاهـي بحيلـة الحيالـه


لاتدور عذر واهـي للخطـا وتختلقـه
ذم ربـي فالبنـادم كثـرة استعجالـه


ولاتحوش الرزق من عوج الدروب الزلقه
ولاتسـوي ماتسـوي العالـم البطالـه


واقترح على السنافي مايضيـق خلقـه
دام ربـي كافـل رزقـه ورزق عيالـه

الشرهة علي


ودعتني تضحك وانا رحت مقهـور
وكل يوم اقول اليوم يصحى ضميرك


ماني على تجديـد الاحـزان مجبـور
بلقى مصيري وانت تلقـى مصيـرك


كنت الوحيد الي اراعيـه بشعـور
واليوم لا احبك ولا احب غيـرك


انا اللي الشرهه علي وانت مشكور
هـذا جـزاي وكثـر الله خيـرك

طيش النفوس



الله يغفر لـي كبـار المسـاوي
في يوم تجزا كل نفـس بعملهـا


انا بوجهه من جميـع البـلاوي
وبحماه من طيش النفوس وجهلها


رب لغيره ما تلوق الشكـاوي
اللي خلق كل النفوس وكفلهـا


لافكت ابواب الامل والرجاوي
افتـر دولاب الزمـان وقفلهـا


ولانقص ظني ولانيـب اراوي
في قدرة اللي لستمالت عدلهـا


حتى لو ان قلبي شفوق هـواوي
وله حاجة يسعالها مـا وصلهـا


ما اخايل الدنيا بعين الشفـاوي
السلعه اللي عند اهلها لاهلهـا


نفسي سموحيه وقلبـي غنـاوي
واللي تروح ويعوضنا الله بدلهـا


لاصرت فالواقع فقير شقـاوي
احلم وخل النفس بالحلم تلهـا

المتوفر حالياً من الأصحاب


يقول طاوعني ولا تجيـب سيـره
ابنصحك يا عل في الامـر خيـره


طوف علشـان اتعـدل امـورك
وجامل خصوصا فالامور الكبيـره


وسولف مع هـذا وهـذا وهـذا
وحتى اللي مايفهم بشي استشيـره


رفع لخلـق الله وضبـط معاهـم
الدنيا حرب اختار دورك وصيـره


اما تكون سلاح والنـاس هـذي
ذخيرتـك والا تكـون الذخيـره


ونافق شفيها ياخـي لمـا تنافـق
لا اول ذنوبك ولاهـي الاخيـره


واكذب يا عمي اصلا الكذب متعه
يكفيك من شره ويعطيـك خيـره


واذا بـلاك الله بقـول الصراحـه
قول الصراحه فالامـور الصغيـره


ازعجتنا بالصح والحق والصـدق
الصدق ما ودى هل الصدق ديـره


وخلص كلامه صاحبي وانا ساكت
ومن عقب ذاك اليوم صاحبت غيره

الوجه الجديد


ماعـاد يرضينـي وفـى ولا يزعلـنـي جـفـى
متساوي فـي خاطـري ظلـم العـرب وانصافهـا


ولا تاقف الدنيا علـى شمـع الغـرام اللـي طفـى
بعض الشمـوع انـا اتعمـد كسرهـا واتلافهـا


من اول لخفيت لـي علـم عـن النـاس اختفـى
واليـوم هـذي حالتـي مابـه حـد مـا شافهـا


قعدت احسب وش ربحت ووش خسرت ووش صفى
ياحـي روس اموالنـا قبـل الطمـع باضعافـهـا


تعبـت ادور فالقلـوب البـارده ليـلـة دفــى
والقـى استغـلال النفـوس وكذبهـا واجحافهـا


حتى اقرب العالم لو يوقـف معـك وقفـت وفـى
اصبـر وتـدري وش دوافـع وقفتـه واهدافهـا


عاد انت يالوجه الجديد اللي تبـي وصـل وصفـى
حبال وصلك شوف لـك نـاس تمـس اطرافهـا


انـا علـى موعـد مـع واحـد وكانـه مالفـى
ما عـاد ابيـش مـن السنيـن سمانهـا وعجافهـا


لاني عقب مارمش عيني صاحـب النـوم وغفـى
حلفت ما رده علـى اشيـا مـن عرفهـا عافهـا


العشـق وامـراض المحبـه واستحـالات الشفـى
واغلـب علاقاتـي مـع العالـم اشـوف انكافهـا


وذالحين عـن اذنـك وسامحنـي اذا لسانـي هفـا
نفسيتـي ماعـادنـي بـقـدر عـلـى لطافـهـا


والموعد اللي كنت قبل شـوي جالـس لـه عفـى
ما جا ودقايق موعـده راحـت وقدنـي خلافهـا