منتديات وهج الذكرى - عرض مشاركة واحدة

اوسمتي · 06-24-2021

نبكي بكي الفراق كبكي العشاق * زادت قلبي حراق خوضت مايا
يا عيني واش بيك اتنوح لا تشكبل * زهو الدنيا يديك ما تعفى ش عليا
زادت قلبي عذاب مصبوغة الأهداب * سكنت تحت التراب قرة عينيا
نبكي و الراس شاب عن مبروم الناب * فرقة الأحباب ما تصبر عينيا
الشمس الى ضوات طلعت وتمسات * سخفت بعد أن سوات وقت الضحويا
القمر الى يبان شعشع في رمضان * جاه الميسان طلب وداع الدنيا
هذا درتو مثيل عن رايسة الجيـــل * بنت احمد صيل شايعة ذواديا
هذا حكم الا له سيدي مول الجاه * ربي نزل قضاه و ادى حيزيا
صبرني يا الله قلبي مات ابداه * حب الزينة اداه كي صدت هيا

تسوى ميتين عود من خيل الجويد * و مية فرس زيد غير الركبيا
تسوى من الابل عشر ماية مثيل * تسوى غابة النخيل عند الزابيا
تسوى خط الجريد قريب و بعيد * تسوى بر العبيد حاوسا بالفيا
تسوى مال التلول و الصحرا و الزمول * ما مشات القفول عن كل ثنيا
تسوى اللي راحلين و اللي في البرين * تسوى اللي حاطين عادوا حضريا
تسوى كنوز المال بهية الخلخال * و اذا قلت قلال زيد البلديا
تسوى مال النجوع و الذهب المصنوع * تسوى نخل الدروع عند الشاويا
تسوى اللي في البحور والبادي وحضور * اعقب جبل عمور و اصفا غردايا
تسوى تسوى مزاب و سواحل الزاب * حاشا ناس القباب خاطي انا الوليا
تسوى خيل الشليل و نجمة الليل * فاختي قليل قليل طبي و دوايا
نستغفر للجليل يرحم ذا القليل * يغفر للي يعيل سيدي و مولايا
ثلاثة و عشرين عام في عمر أم حرام * منها راح الغرام ما عاد شي يحيا
عزوني يا اسلام في ريمة الاريام * سكنت دار الظلام ذيك الباقيا
عزوني يا صغار في عارم الاوكار * ما خلات غير دار عادت مسميا
عزوني يا رجال في صافي الخلخال * داروا عنها حيال للساع مبنيا
عزوني يا حباب فيها فرس دياب * ما ركبوها ركاب من غير انايا
بيدي درت الوشام في صدر أم حزام * مختم تختام في زنود طوايا
ازرق عنق الحمام ما فيهشي تلطام * مقدود بلا قلام من شغل يديا
درته بين النهود نزلته مقدود * فوق سرار الزنود حطيت سمايا
حتى في الساق زيد درت وشام جريد * ما قديتو باليد ذا حال الدنيا
سعيد في هواك ما عادش يلقاك * كي يتفكر اسماك تديه غميا
اغفر لي يا حنين انا و الاجمعين * راه سعيد حزين بيه الطوايا
ارحم مول الكلام و اغفر لام حزام * لاقيهم فالمنام يا عالي العليا
و اغفر اللي يقول رتب ذا المنزول * ميمين و حاودال جاب المحكيا
يا علام الغيوب صبّر ذا المسلوب * نبكي الغريب و نشف العديا
ما ناكلش الطعام سامط في الافوام * و احرم حتى المنام وخطى عينيا
بين موتها و الكلام غي ثلاث أيام * بقاتني بالسلام و ما ولات ليا
تمت يا سامعين في الالف و ميتين * كمل التسعين، زيد خمسة باقيا
كلمة براس الصغير قلنها تفكير * شهر العيد الكبير فيه الغنايا

نجمه ليل معجب بهذا