قصة رائعة نسمع تفاصيلها ترويها الشابه التي حصلت معها :👇👇
انخطبت لشب بألمانيا الحمد لله اخلاقو كويسة ومتعلم ومن عيلة محترمة ضلينا نتواصل انا وإياه عبر النت فترة منيحه
الحقيقة حبيتو لانو ظريف ودمو خفيف
صرنا نمشي بأوراق الزواج لانو بدو يعملي لم شمل وانا شرطي اني اطلع نظامي وبالطيارة وهو وافق على هل الاساس
بعد فترة صار يقول انو الاوراق عم تتعثر معو ولم الشمل راح يطول بيجوز سنتين وهو حابب اجي لعندو بسرعة وأقترح علي اطلع تهريب عن طريق البحر
بالبداية رفضت كتير وخصوصا انا بخاف من البحر وما بعرف اسبح وبعدين كنت عم اسمع وشوف الناس كيف عم تغرق
بس هو كان مصر رغم خوفي الشديد و وصار يقلي انو الرحلة مأمنة وكتير ناس طلعت وخلال اسبوع بتكوني عندي احسن وماننطر سنتين
المهم اقتنعت بالاخير وخصوصا انو رفيقتي طالعة معي بنفس الرحلة لعند خطيبها
حضرت حالي ورحت على لبنان انا ورفيقتي وبعد ماطلعنا بالقارب اتفاجات بالعدد الهائل الموجود فيه بس هون ماكان فيه مجال للرجعة
نحن قاعدين فيه شب سمعتو عم يحكي لواحد انو امو ماتت وابوه سافر من زمان وما عاد سمعو شي عنو وصار يضحك و يقول لرفيقو أمانة اقرئلي الفاتحة عن روحي لانو ماعندي حدا يتذكرني
مشي فينا القارب وبعد حوالي كم ساعة بلشنا نغرق أمسكت برفيقتي مظبوط لانو مابعرف اسبح وخلال دقايق كنا بالمي و بذكر آخر شي سمعتو هو صوت الناس وهي عم تصرخ لانو وقتها من الخوف اغمي علي
فتحت عيوني لقيت حالي مربوطة ببيدون مازوت حاولت دور على رفيقتي بس ماشفتها جنبي😔😔 التفتت لقيت الشب يلي كان بالمركب عم يجرني
سألتو متل المجنونة وينها رفيقتي ..وينها رفيقتي
قال: والله مابعرف انشالله بيلاقوها
بذكر كان الموج عالي وعم يخبط فيني وكل مرة يفلت البيدون من ايدي وأغرق لتحت يرجع هو يغطس ويرفعني وبالاخر صار يقلي امسكي مظبوط برقبتي الشغلة ما فيها مزح
المهم ضلينا بالمي كتير وما حدا اجا ينقذنا حتى ضو ماعاد شفنا
وكل ما شاف خشبة او شي عايم يركض يجيبها ويربطها فيني بالآخر شلح قميصو ربطه فيني وصار يقلي ديري بالك وخلي عقلك معك ومااتفكري بشي منشان مايفصل عقلك وصار يسألني ويحكي معي منشان يضل عقلي معي

انا هون أتعبت وفرطت من الجوع والعطش ماشفت الإشال من جيبو بون بون وقلي كليها انا ما بحبها
حاولت آكل شوي وأعطيه شوي بس هو رفض

اطلع فيني و قلي لسا بتجي على البحر بعد يلي صار فيكي ؟؟؟
قلتلو : ايه اذا معك بجي الف مرة
هون اجيت موجة عالية . وما عاد اتذكرت شو صار
فتحت عيوني لقيت حالي بالمشفى وحوالي أمي وأخواتي
أمي صارت تبكي من الفرحة وقالتلي انهم وقت شافوني كان مربوط فيني بيدونات وخشب وقناني بلاستيك منشان مااغرق
انا هون احكيت لأهلي شو صار معي وسألت عن الشب يلي كان معي بس ما حدا عرف عنو شي😔😔
وصرت دور عليه بالغرف واسأل عنو بركي بشوفو بس للاسف ما شفتو وبعد يومين جابو جثث على المشفى وكان هو من بيناتهم قلت لامي واخواتي بدي آخدو معي لانو مالو حدا هون يسأل عنو او يدفنو
اخي قلي: مجنونة على اي اساس راح ناخدو
انا : قلهم انو خطيبي
المهم اخي دبر الوضع واخد الجثة على اساس هيدا خطيبي ونحن منعرفو
اخي كتب بوست على الفيس معنا جثة شهيد مالو حدا غير الله وبدنا نطلع جنازتو بكرة يلي بيحب يشارك
ونحن بالطريق مرينا من جنب البحر قلت لاخي وقف هون نزلت ووقفت قدام البحر ورميت خاتم الخطبة واطلعت بالسيارة امي ما حكيت ولا كلمة
يوم الجنازة اطلعت على البرندا ما صدقت المنظر....كانت الناس متل المطر تحت بيتنا أصواتهم اقوى من موج البحر الكل عم يقولو الفاتحة وبترحم عليه والشاطر عم يزاحم منشان يحمل نعشو... جنازتو كانت مهيبة بشكل
ابكيت من قلبي من جوا لانو كان مفكر حالو اذا مات ماعندو حدا يقول الله يرحمك
بس يلي صار كل الناس يلي شافت البوست كانت عم تترحم عليه .

وعرفت وقتها انو هل الشب مانو قليل عند رب العالمين

الرجولة مانها شوارب وعضلات وصوت عالي الرجولة مواقف

💢💢💢💢💢💢

مما قرأت

المواضيع المتشابهه:

• ( تـحطِيم الأطفَـال في الصِغر..يقتلهم عِند الكِبر ) مُشَاهَدَات واقعية
• يا مسلم إقرأ واعتبر .. قصة واقعية
• يوم مات أبي (خاطرة واقعية بقلمي)
• لوحات باستيل واقعية للماء والجليد
• قصة واقعية عن الوفاء

ريماس ,الجوري معجبون بهذا