احيانا زوجتي بتنادي عليا وهي قاعدة فاضية او وهي بتغسل المواعين او بتنشر الهدوم …فلما ارد عليها واقولها (نعم … محتاجة حاجة؟) … تقوللي (تعالي اقعد معايا… عاوزة أتونس بيك شوية 🙂 )… وقتها باسيب اللي في إيدي (ما دام حاجة ممكن تتأجل) واروح اقعد جنبها واحاول افتح اي حوار او اساعدها في الحاجة اللي بتعملها.
واحيانا انا بكون مضايق شوية او شغال في حاجة … وهي بتكون عاوزة تروح تروق حاجة او تروح تغسل المواعين او قاعدة بتقرا كتاب …وانادي عليها …واطلب منها تيجي تقعد جنبي عشان انا عاوزها تونسني … فهي تسيب اللي في إيدها وتيجي تقعد معايا وتفتح اي موضوع عشان نتكلم او تقعد تكمل قراية جنبي وانا شغال…وهي بتعمل ده وهي عارفة اني فعلا مبسوط بوجودها جنبي حتى لو مش بتعمل حاجة.
سيدنا آدم رغم انه كان عايش في الجنة اللي مليانة بالنعيم …لكنه كان حاسس بالوحشة والوحدة…وافتقاد (الونس) أكتر شعور كان حاسس بيه قبل ما ربنا يخلق حواء من ضلعه.
(الونس) إحتياج مهم جدا لاي انسان… وأحد أهم دوافع الجواز… عشان كده لازم كل واحد فينا يكون حريص انه يسد الاحتياج ده عند شريك حياته…ويطلبه لما يحتاجه.
إدراكنا للمعنى ده هايخلينا نفهم شوية حاجات زي :
- هاتفهم ليه مراتك بتفضل تحكيلك تفاصيل تافهة بعد ما ترجع م الشغل …هي بتتكلم معاك لانها جعانة ونس
- وهاتفهمي ليه جوزك ممكن بيضايق لما تخرجي وتسيبيه قاعد لوحده ويفضل يتصل بيكي عشان ترجعي رغم انك مجهزاله كل اللي هو محتاجه.…لانه بيضايق لما بيقعد في البيت من غيرك (ولو ان في رجالة بتستني اللحظة دي 😂)
- وهاتفهم ليه مراتك عاوزاك تروح معاها المشوار اللي هي رايحاه رغم انها بتعرف تروح لوحدها.... لانها عاوزة تتونس بيك في الطريق
لما شريك حياتك يعمل حاجة او يقولك حاجة معناها (انا عاوز أتونس بيك) …لازم تهتم.
الونس او (الأنس) شعور جميل مش هانعرف قيمته غير لما نفتقده.... الونس هو الشعور اللي بيكمل معانا بعد ما نكبر ونعجز وبعد ما صحتنا تروح واولادنا يتجوزوا.

- دفا البيوت



⬅️ منقول

المواضيع المتشابهه:

• البيوت لا تبنى الا بالحب
• من أين تهدم البيوت
• العبودية.. في البيوت!
• بيت نظام من روائع البيوت الدمشقية
• البيوت المهجورة

ريماس ,ملكة الحنان ,انسان و ملاك معجبون بهذا