عدّى النهار والمغربية جايّة.. تتخفى ورا ظهر الشجر
وعشان نتوه في السكة.. شالت من ليالينا القمر

وبلدنا ع الترعة بتغسل شعرها.. جانا نهار مقدرش يدفع مهرها

يا هل ترى الليل الحزين.. أبو النجوم الدبلانين.. أبو الغناوي المجروحين

يقدر ينسيها الصباح.. أبو شمس بترش الحنين

أبدًا… بلدنا للنهار… بتحب موّال النهار

لما يعدي في الدروب.. ويغني قدّام كل دار

والليل يلّف ورا السواقي.. زي ما يلف الزمان

وعلى النغم …تحلم بلدنا بالسنابل والكيزان

تحلم ببكرة واللي ح يجيبه معاه.. تنده عليه في الظلمة وبتسمع نداه

تصحى له من قبل الأدان.. تروح تقابله في الغيطان

في المتاجر في المصانع.. في المدارس و الساحات

طالعة صحبة صفوف جنود.. طالعة له رجال أطفال بنات

كل الدروب واخدة بلدنا للنهار.. واحنا بلدنا للنهار بتحب موّال النهار
لمّا يعدي في الدروب.. ويغني قدام كل دار


تأليف الشاعر الأستاذ (عبد الرحمن الأبنودي)
الله يرحمه ويغفر له