على اسم مصر

على اسم مصر التاريخ يقول ما شاء
انا مصر عندي احب و اجمل الاشياء
يا حبها و هي مالكة الارض شرق و غرب
و يا حبها و هي مرمية جريحة حرب
باحبها بعنف و برقة و على استحياء
و اكرهها و العن ابوها بعشق زي الداء
و اسيبها و اطفش في درب تبقى هي في درب
و تلتفت تلاقيني جنبها في الكرب
و النبض ينفض عروقي بالف نغمة وضرب
على اسم مصر
انا الذي مشيت ادور باشتياق و حنين
على مصر و المشي خدني من سنين ل سنين
لحد مت سنينها و سنيني بقم واحد
و عاصرتها يوم بيوم لم فاتني يوم واحد
و حضرت شاهد عيان مولد و موت ملايين
ما زعلت من كلمة قد البركة في الجايين
مين هم دول يا جدع ما توحد الواحد
البركة فينا و في السامعين بالواحد
انا قلتها بنرفزة من غيرة الواحد
ع اسم مصر
ع اسم مصر ارفعوا الانخاب و املوالي
شدوا الوتر ع القمر و غنوالي
نشكر ع حبها بالفن والاحساس
نسكر و دمع الحماس يملا لنا تاني الكاس
احنا يا حلوة الفدا بس اطلبي و قولي
يا سمرة بعيون كده و سنتك لولي و غنوة الحب تعلا و يسمعوا الحراس
يصفروا و يحضروا بفرقة طبول و نحاس
و يتقفل سجن مصر امام عيون الناس
ع اسم مصر