ديوان الشاعر : عبدالله بن علوش الهاجري

مزعلة الغواني


صحيح ان ضيعة القلب التماني
ونقض الحلم الاول حلم ثانـي


رعاك الله ياعصـر السلامـه
قبل لاعرف مزعلـة الغوانـي


انا قبـل اعرفها كنـت دالـه
مثل خلق الله اللي فـي زمانـي


طبيعتها طبيعـة كـل زينـه
تغريـاف وكبـر واغنجانـي


سوالفهـا تعيفنـي السوالـف
وضحكتها تنسينـي الاغانـي


الى منها طرت لي قمت واقـف
على طولي ولو محـد دعانـي


اسوي لطيفها العابـر قصيـده
وذكراهـا تلهمنـي المعـانـي


سقتني الصبر مسموم وشربتـه
ودانيته وانـا مانيـب ادانـي


وصبرت ارجي وفاها واحتريها
وهـي الله بلاهـا بمتحـانـي


ولكنـي علـى عهـد المحبـه
ولو منهـا دهانـي مادهانـي


لها وجهي وستـر الله وامانـه
فلا بوصوفهـا ينطـق لسانـي


شلون احفظ هواها واحترمها
ورويهـا الفلانـي والفلانـي


زوي قلبي عليهـا زوي حبـل
مقطعتـه عتيقـات السوانـي


حماني حبها مـن الحـب كلـه
زهـدة بغيرهـا والله هدانـي


واذا جادة علي بوصل ساعـه
فيفداها عقبهـا مـن جفانـي


لحد يضحك على الحـب لنـي
ضحكت ابهم واشوف الله بلاني


بليت بحب من لاتعتـرف بـه
وتضحك بالهوى مثل اضحكاني