شكراً: 120

تم شكره 321 مرة في 228 مشاركة

أما بعد




شح الكـلام وصملـن الطواريـق
والشعر لو وقفـت واصـل طريقـه


فأن كان من عقب السعه حدك الضيق
منصاك من عقـب الخيـال الحقيقـه


كم لك تلفق مـن خيالـك تلافيـق
بأوهام جـاوزت الخليـج ومضيقـه


تمـدح ردي وتركبـه قمـة طويـق
وتكتب غزل عاشق ولالك عشيقـه


وتسافر لجمهـور عطشـان تصفيـق
وتنـافـس المتعلـثـه والعويـقـه


تجري ورى الاعلام وتخـب وتويـق
ومع كل تافه لـك علاقـه وثيقـه


لانك تحسب الشهره تجـوز وتليـق
وانهـا علـى كـل الاوادم شفيقـه


ماتدري انها تشـب وتغـط وتفيـق
واحيـان تقطـع بالرفيـق ورفيقـه


رح علـم اللـي شهرتـه بالتوافيـق
بكره اذا طال المـدى نشـف ريقـه


ثلاثـه الشعـار خـل الملاحـيـق
ماعـاد للرابـع معاهـم طريـقـه


شاعر وينحت فالصخر نحت ذوييـق
وشاعر يغرف من البحـور العميقـه


وشاعـر اذا مـر الحدايـق مغاليـق
قامت تفتـح لـه حديقـه حديقـه


لفكـار فيهـن البكـار الغرانـيـق
النايـفـه والـذايـره والرشيـقـه


اللـي ماهـن يـراوزن التفافـيـق
واللي تسلف بندقـه مـن صديقـه


واما بعد ياهـل العـزوم الشواهيـق
ياللي عليكـم كـل نجـم وبريقـه


الى متـى وحنـا العيـون الغواريـق
والى متى وحنـا القلـوب الرقيقـه


والى متى وحنـا الرقـاب المدانيـق
والى متى وحنا هـدف كـل ضيقـه


واما بعـد ياهـل الوفـى يالمطاليـق
ياهل البيـوت الشامخـات العريقـه


حنا بزمن غفلـه وجفـوه وتفريـق
واخـلاق منحلـه وعالـم طليقـه


تمسكـوا بالعروتـيـن المواثـيـق
المصحـف وسنـة نبـي الخليـقـه


وامـا بعـد يـا قافليـن الصناديـق
لعـل روس اموالـكـم للحريـقـه


فقرانكم مـا حصلـوا بلـة الريـق
وانتـوا تعـدون الذهـب بالدقيقـه


والا تبثونـه علـى غيـر توفـيـق
فـي مزاينـات وجاهليـه عتيـقـه


واما بعـد الاحـلام تحتـاج تحقيـق
والحلـم حملنـاه مــالا يطيـقـه


شرع الله ان حصل على الارض تطبيق
وشفت المساجد بالعـرب مستظيقـه


فأبشر بنصـر بأمـر رب المخاليـق
وابشـر بريحـان النعيـم ورحيقـه


واما بعد ياحسين صلـح لـي بريـق
في خايعن طشـت عشوبـه وريقـه


الـذود فالصمـان والنفـط فبقيـق
والله يخلـي مملكتـنـا الشقيـقـه