قصه ومشهور متجدد

بيومي فؤاد ... الجوكر

بيومي فؤاد واحد من اكتر الممثلين الاندر ريتد في مصر .. يعني مش واخد حقه .. مش واخد حقه ايه يا بني .. دا بيظهر اكتر من تريند حسام وشيرين.. دا حقيقي هو بيشغل كتير جدا.. بس مش لاقي التقدير المناسب لا جماهيريا ولا نقديا.

بيومي فؤاد بيلعب في منطقة لوحده.. مهما ظهر على الشاشة في دور صغير بيقدر يخطف عينك .. بيومي فؤاد اكتر ممثل اشتغل في السينما في اخر خمسين مثلا .. ما شاء الله .. عايز اقولك ان في 2023 اللي هي اصلا لسه مبدأتش دي .. بيومي فؤاد مخلص 5 افلام .. يعني ليه 5 افلام لسه هينزلوا 2023 .. ومسلسل رمضان كريم2 .. دا اللي هو الاصطباحة .. لسه بنقول يا هادي ..

دا بيحتاج قدرة رهيبة على التنقل بين الاستوديوهات والتنظيم والترتيب بين اللوكشينات .. وهو ما شاء الله عنده كاريزما هايلة ويقدر يعمل اي حاجة .. اي حاجة .. اي حاجة .. دراما ماشي .. كوميدي ماشي.. هنهرج ماشي .. اعلانات ماشي.. كنشا ماشي .. غرقانة ماشي.. الراجل ما شاء الله عليه هاته في اي حاجة وهو يسد .. ونا كان دا بيهدر موهبته اصلا .. يعني فيلم زي الشنطة تأليف نجم الجيل الحقيقي .. الفيلم دا انا واثق ان بيومي فؤاد هيندم انه عمله .. هو ليه 300 فيلم .. اعتقد تلتهم هو مش راضي عنه .

قابلت بيومي فؤاد مرة واحدة في حياتي.. كانت في الدقي في مكتب اخوه ..المحامي الاستاذ سليمان فؤاد.. كان الاستاذ بيومي لسه في بدايته وساعتها كنت كاتب سيت كوم اسمه "رمضان سوبر غلبان"، وروحت عرضته عليه .. واتصورت معاه الصورة اليتيمة اللي جمعتني بيه .. ما شاء الله ادب واخلاق وثقافة وخفة دم مش طبيعين .. اي نعم هو مردش لغاية دلوقتي تقريبا من 8 سنين .. بس مش مهم المسلسل اصلا..

المهم ان بيومي فؤاد ممثل كبير .. يمكن كثرة وجوده على الشاشة في اعمال كتيرة لدرجة ان امي في مرة قالت انا خايفة افتح التلاجة الاقي فيها بيومي فؤاد.. (كان مرة عمل 9 مسلسلات في رمضان).

بالمناسبة ... بيومي فؤاد اسمه .. بيومي فؤاد حداد .. واسم بيومي والدته سميتهوله على الشيخ علي البيومي .. وحكي مرة انه كان راكب مع سواق تاكسي.. فالسواق قال هي كلها ماشية بالبيومي .. فسأله يعني إيه .. قاله يعني ماشية بالعبيط..

بيومي فؤاد جابها من تحت قوي زي ما بيقول هو في مسلسل اللعبة .. يعني مثلا بيومي فؤاد سنة 1999 ... عمل دور اصغر من انك تعرف تشوفه .. كان أحد أعضاء فرقة أم كلثوم وكان كومبارس صامت.. مفيش تحت اكتر من كدا.. بعد 4 سنين .. في سنة 2003 عمل دور عباس في شباب أون لاين 2.. حلقة واحدة بس .. في فيلم حليم عمل دور أحمد فؤاد حسن صغيرا وكان ليه مشاهد واتحذفت فظهر برضه من غير كلام وكرر الدور في مسلسل حليم .. دا ظهر في دكان شحاتة .. وفي بكار.. والله عمل دور في بكار..

لكن اكتر حاجة حزت في نفسه لما كان هيعمل دور جلال .. والد أحمد حلمي في فيلم ألف مبروك .. وتماما تمام وكان فرحان بالدور قوي واتدرب عليه .. بس حلمي رفض .. قال انا وبيومي مفيش فرق كبير ما بينا (بيومي مواليد 1965 وحلمي مواليد 1969 .. يعين بينهم 4 سنين).. ساعتها حلمي جاب الفنان محمود الفيشاوي اللي مات بعد الفيلم .. وبيومي زعل بس مثل في الفيلم دور حسيب - مدير جلال في الشغل..

انا واثق ان الزمن هينصف بيومي فؤاد . وهنقول كان عندنا فنان كبير اسمه بيومي فؤاد .. جوكر وليه الف وجه .. وقادر يتقمص اي حاجة وبيمثل وهو سايب ايديه. .

قلم بهاء حجازي

نجمه ليل معجب بهذا