إطعام شيكولاته

- واحده أعرفها مره عملت إطعام شيكولاته كيت كات ، كانت بتوزعها على الولاد المحتاجين، لقت راجل على قده بيبصلها، ف أدتله واحده، ف لاقته شلها، رجعتله وقالتله ممكن ترجعها المحل الفلاني وبدلها باللي يعجبك، قالها لا دي شكلها حلو قوي، أنا شيلتها اكلها مع الجماعة والولاد!

- واحد أعرفه من بعيد توفى ، وأنا في عزاه عرفت أنه كان بيطلع في شنط رمضان كل أنواع المكسرات اللي بيحبها، وكان بيقول عمرهم ما هيشتروها لازم إحنا نجيبهالهم

- راجل كبير ، كان كل ما يشرب عصير قصب لازم يعزم أي اتنين غلابه من الشارع معاه على قصب

- ست كبيرة قاعدة لوحدها، كانت تقولي أنا لما يبقى نفسي في حاجه حلوة أكلها، كنت أشتريها واروح عند فلانة وولادها، ناكلها سوى، أصل فلانة دي ظروفها على قدها، أجيب صينية البسبوسه ولا الكنافه واطلع عليهم اكل حتتي وهما بالهنا والشفا ياكلوا الباقي

- عائله ملتزمه وميسورة الحال، الابن الكبير كان عنده حب تغير العربية بتاعته كل سنه، وممكن مرتين في السنة، ابوه حكم عليه ميغيرش عربيته الا لما يدفع مقدم تاكسي لست ارمله محتاجه، وجابلها التاكسي فعلا واخوها اشتغل عليه وكملوا هما الاقساط..

لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ ۚ وَمَا تُنفِقُوا مِن شَيْءٍ فَإِنَّ اللَّهَ بِهِ عَلِيمٌ

جـّرب مره ، ولو مره واحده في حياتك، ولو لشخص واحد بس.. إنك تنفق من أكتر حاجه بتحبها..عشان تنال البر ..

وَإِنَّ الْبِرَّ يَهْدِي إِلَى الْجَنَّةِ .❤


▫️◻️▫️◻️▫️◻️▫️◻️

مما قرأت

المواضيع المتشابهه:

• فضل إطعام الطعام

الجوري ,ملكة الحنان ,ريماس و 3 آخرون معجبون بهذا

ناطق العبيدي ,وارفة البيان ,انسان و ملاك