إزاي نحمي ولادنا وهما بعيد عن عنينا

اوسمتي · #1 منذ 19 ساعات

إزاي نحمي ولادنا وهما بعيد عن عنينا ؟⛔️✋🏻

بعد اللي قريته للأسف من قصة الطفل ياسين اللي عاش سنة من اللام شمسيه في صمت !
تعالو نحكي كلام مهم

_أول ✍️:خطوه عشان أحمي بيها طفلي هيا إني أفهمه ✨
نبدأ بأهم نقطه :
كراهية إبنك لمكان وبيبقى رافض يروحه تمامًا
حتى لو محكالكيش هوا بيتعرض لإيه هناك لكن لما تلاقي ابنك مرعوب أو كارهه مكان انه يروحه بشدددده لازم تعرفي ان في حاجه غلط!
لو فجأه بقى بيعيط مش عايز يروح المدرسه نهائي أو بعد ما كان بيحب النادي بقى بيكرهه فجأه دي أول علامة ليكم كأهل ان في سبب وإن الطفل بيتعرض لحاجه في المكان ده
حتى ممكن تكون تنمر أو غلاسه من طالب ما
!
احنا مش بنسمع ولادنا بس لما يتكلموا احنا بنسمعهم بقلوبنا حتى وهما ساكتين
_ ثانيًا✍️:
لما ألاقي تغيرات في تصرفات ونظرات ابني ده مهم جدًا إني ألاحظه
يعني بيقعد حزين كتير بيقعد سرحان كتير
بقى بيخاف ينام بليل لوحده فجأه
كان شاطر وبيقوم يروح الحمام بليل فجأه رجع يبلل فراشه تاني ! بقى يمسك في مامته وباباه زياده وعايزه أحضان طول الوقت لأنه خايف !
أو العكس بقى فجأه كارهه جدًا اللمس ومش طايق حد يلمسه
ممكن الولد بعد ما كان بيتكلم كويس فجأه يحصله تهتهه!
أو يجيله نوبات غضب !
بيجيله فجأه كوابيس كتير وهوا نايم !
تغير مفاجئ في مستواه الدراسي !
كان بيحب مادة ما فجأه كرهها ومبقاش طايق يروح الدرس بتاعها
كان بيحب يحكي ويرغي كتير عن حاجات شافها في الكرتون وحاجات اتقالت قدامه في المدرسه وبطّل !
مش معقول احنا كأهل مش هنعرف كارثه بتحصل لأولادنا غير لو قالولنا بالبق ! لازم نراقب تغيرات سلوكهم والحاجات الغريبه اللي بتحصلهم
_ثالثًا✍️ :
المفروض في ✨مساحة صداقه✨بيني وبين ابني
مش بقول شرط هيحكي عن اللي حصل لأي سبب بقى خايف أو متهدد أو حتى خايف من رد فعل أهله
لكن مساحة الصداقه دي معناها ان
✨لازم في كلام يومي بينا✨ عن حاجات عبيطه
لازم ابني يجي يقف جمبي وأنا بطبق الهدوم مثلًا ويقعد يحكيلي وياكل دماغي عن كرتون شافه أو واحد زميله قال حاجه عبيطه ومضحكه أو رسمه هوا حابب يرسمها أو لعبه نفسه يجيبها أو قصه خياليه عبيطه في خياله

ولازم أكون دايمًا بسأله أسئلة ثعبانيه عشان أتطمن عليه
مين أكتر واحد صاحبك في الفصل/النادي/الدرس ؟
طيب مين الولد اللي تتمنى لو نقلوه فصل تاني ؟
طيب مين أكتر مدرسه لطيفه ؟ طب مين رخمه؟
طب الرخمه دي هل عمرها ضربت حد في المدرسه ؟(مش ضربتك انت لأن ممكن يخاف ميقولش) لكن لو هيا بتضرب عمومًا وقال اه ضربت عمر نروح نشوف ايه قصتها
لازم نبقى مفتحيين
رغبة الطفل في إنه يكون أقوى (بشكل مبالغ فيه) فجأه ده معناه انه حاسس بالضعف ومش قادر ياخد حقه لسبب ما !

_رابعًا✍️:
ملابس وجسم ابني
ملابس ابني الداخليه لو لا قدر الله في أي حاجه لازم هلاقي فيها حاجه مش مريحه لازم أتابع التغيرات اللي بتحصل في ملابسه !
دخول الحمام معلش أنا اتجننت من البوست يعني ايه طفل يقعد سنه بيشعر بألم ويعيط في الحمام زي ما قال !
لو ابنك بيطول في الحمام و بيشتكي من ألام لازم تفهمي في ايه وتكشفي فورًااا !

_خامسًا✍️ :
غير إني أفهّم إبني الفرق بين اللمسه الصح واللمسه الغلط
لازم أفهمه إن اي حاجه مؤذيه تحصله هيا مش ذنبه زي ان حد ضربه او ضايقه أو لمسه أو تنمر عليه
وإني قادر كويس جدًا اني أدافع عنه
وده يا حضرات بيبدأ من المواقف البسيطه زي مثلًا لما حد يتريق على شعره مثلًا أو على لونه الأب والأم مش بيسايروهم ويضحكوا ! ولا بيتكسفوا يردوا
دول بيقفوا آسود في ضهره يردوا عنه
ويتكلموا عن مميزاته هوا بيشعر بالقوة ..
لازم الأب والأم يدوا الطفل ثقه بنفسه وفي مميزاته ويحسسوه انه مميز
الرياضه ودي مهمه جدًا اني اشغل وقت إبني وأدخله رياضه تزيده قوة وكمان تديله ثقه بالنفس و تملى وقته لأن أسوأ حاجه في الدنيا الفراغ
هوايات زي الرسم مثلًا
ونلاحظ ان اللي الولد بيرسمه بيدل على الحاجات اللي بتواجهه في حياته
لو حابين نتكلم عن تحليل رسومات الأطفال أكتر
وبردوا لو حابين أكتب لسته بالأسئله اللي نسألها لولادنا بإستمرار
..
لازم مشاعرنا وقلوبنا تكون متواصله مع مشاعر وقلوب ولادنا عشان نعرف تعبهم وحزنهم من نظرة عينهم ونعرف إزاي نقويهم
ربنا يبارك في أولادكم ويجعلهم أحسن وأسعد الناس ♥️

--------♡♡♡♡♡---------

المواضيع المتشابهه:

همس المطر معجب بهذا