المستشفي

اول امبارح وانا بايت في المستشفي حصل موقف علمني ان الحياة مش هتديلك الفرصة الي انت عايزها

اب جايب ابنه المستشفي ، ومن الواضح ان حصل خناقة بين الاب والابن هي الي تعبته ووصلته لكده ، كان باين جداً من ملامح الأب انه مش متأثر نهائي مش فارق معاه وجاي معاهم غصب عنه ، واقف برة المستشفي كل الي فارق معاه انه عايز الموضوع يخلص علشان يروح ينام

كنت شايف الموقف من اول وصولهم .. فضلت شوية متابع الأب غصب عني لحد ما جاتله مكالمة وفضل يزعق ويقول هو كل يومين يعمل نفس الموضوع ونجيبه المستشفي .. المكالمة كانت طويلة وكلها قسوة " لفت نظري جملة في وسط المكالمة " كان بيقول انا عايز اطلعه راجل انا قسوتي عليه علشان يجمد كده ، لا مش هدخله امه معاه جوة هبقي اراضيه بكلمتين لما يخرج ونروح بس ده علشان خاطرك انت

فات ساعة في التانية وانا غصب عني كل شوية اتابع ملامح الاب الي مش باين عليه اي حاجة غير الجحود ..، لحد ما جت اللحظة الي الامن نده فيها علي اسم وقام الراجل بأمتغاض شديد يرد وعرفت ان ده اسم ابنه ...

البقاء لله .. كانت الكلمة من بتاع الامن للأب الي وقع في لحظتها علي الارض واتحول الجحود الي كان فيه لبكاء شديد وصراخ " خلاص والله قولوله يرجع وانا مش هزعله تاني مش هضايقه مش همد ايدي عليه خلاص انا غلطان والله انا كنت فاكره بيكدب لما كان بيقول قلبي بيوجعني منك "

وقفت في مكاني مش عايز اتحرك او اروح للراجل اواسيه ، المرة الوحيدة الي ابقي مش قادر اتعاطف مع شخص في حالة زي دي ، كل الناس من حواليا رايحين نحية الراجل يطبطبوا عليه ويشيلوه من علي الارض وانا الوحيد الي ثابت في مكاني متحركتش

كان نفسي اقوله شوفت ان الحياة مش هتديلك فرصة تصلح الي خربته ! شوفت انه مكانش بيمثل زي ما كنت بتقول ، شوفت ان قسوتك عليه معملتش منه راجل دي خدته منك خالص !!

انا معرفش ايه الي حصل بينهم وهل هو كان كويس ولا لأ ، بس الي شوفته ان القسوة مجابتش غير قسوة ، وان الحياة مش هتديلك اكتر من فرصة ، رفضت تدخله تراضيه بكلمتين كان ممكن فعلاً ينجدوه واجلتهم لما تروح .. للأسف اهو سابك ومش هيروح معاك ولا هتلحق تراضيه ..سيدي الفاضل احنا حصن الامان لابنائنا ٠٠فماذا لو كهرناهم واصبحنا احنا الاعداء٠٠فاين اجد الامان؟؟

بلاش القسوة وبلاش العند وبلاش تأجلوا تصليحكم للغلط ، الحياة مش علي مزاجك هتسيبك تختار الوقت الي تصلح فيه غلطك .٠٠
؜واحده بعتت سؤال لعالم وامام بتقوله :-
؜ هل لين القلب يؤخذ عليه أجر ؟ إن عيني تدمّع أو قلبي يوجعني على شخص أو حيوان أو موقف حصل ؟

؜رد عليها رد جميل أوي قالها "دي صفات أهل الجنة ، يدخلون الجنة بغير حساب قلوبهم مثل أفئدة الطير ، الناس اللي قلبها حنيّن ودمعتها قريبة ، سيدنا عُثمان في غزوة بدر كل الجيش طلع وهو فضل جنب السيدة رُقية زوجته لأنها كانت تعبانه فَقعد يخدمها ويطببها فَدعاله النبي ﷺ لأنه إنسان حنيّن ، فَالقلب الرقيق ده إن شاء الله يدخل الجنة بغير حساب"

؜الطيّب مش عبيط واللي دمعته قريبة مش نكدي


💢💢💢💢💢💢
مما قرات

المواضيع المتشابهه:

• المستشفى العسكري المهجورة بألمانيا
• فنان مصري مخضرم يدخل المستشفى بعد تعرضه لوعكة صحية
• صور لانا وهي في المستشفى...ادعولها